連登巴打辛苦儲百多萬首期求600萬兩房戶　被地產經紀笑：只買到納米樓

香港人都有一個「上車夢」，但成功上車談何容易。有連登巴打辛辛苦苦儲到一百多萬元首期，打算上車，目標購入約600萬元的兩房單位，怎料原來此價錢只可購入「納米樓」，更指地產經紀覺得「得啖笑」，巴打慨嘆辛辛苦苦儲錢，原來自己只是一名「死窮L」

日前有連登巴打以「好努力咁草(儲)左球幾去買樓..咩都買唔到」為題分享買樓經歷。巴打稱，自己辛苦工作數年，終於儲得百多萬元作首期，打算「借到盡」買入約600萬元的兩房單位。他走入地產舖向地產經紀查詢市況，怎料對方望望巴打然後得啖笑，巴打才發現原來自己「銀彈」不足，只可買「納米樓」。巴打無奈慨嘆：

我辛辛苦苦， 死慳死抵， 揸住百幾萬走落去， 以為自己都有啲錢， 原來只係個死窮L， 揸住百幾萬都要畀個aa歧視。

不少網民隨即分享意見，並指「大西北幫到你」、「大西北上住車先」，建議巴打購入天水圍等新界地區樓盤，當中不少人都建議購買天水圍嘉湖山莊，亦有網民建議巴打考慮低層單位。網民指，「今時今日得百幾萬真係好少」，巴打要自己辛苦儲錢「已輸在起跑線」：

而家一球左右根本唔係咩錢，你要靠辛苦儲番黎已經落後左好多，本身有物業果啲幾球幾球咁賺

多少首期先可以買樓？

其實一百多萬元苜期足夠嗎？手持多少首期才可上車？有連登巴打打算結婚，就提出此疑問「人工同首期有幾多先有能力諗買樓?」

有網民就詳細幫巴打計一計，以購買600萬元單位作例子，需要120萬元作首期，然後稅項、佣金、律師費約26萬元。而巴打入息至少要4.7萬元：

都係用600萬樓做例子 多$1成條數都唔同左
Setting 三粒星冇樓係身
首期120萬
稅18萬
佣金6萬
律師費最多2萬（特別麻煩果啲 普通就幾千一萬 仲有少少實報報銷 有限錢）
呢到基本野就146萬 同之前有位巴打講150萬差唔多

以上係講緊向銀行做8成，供19500左右，入息就47000左右 （入息可以加擔保 同埋我係計2.5% ）。如果可以既話平時留定半年供樓既錢係到 萬一失左業都有啲錢供一段時間 ，總之你唔好斷供銀行冇咩事都唔會搵你。

當然裝修幾錢就睇你，幾萬到成百萬都有，冇記錯整水同電好似最貴，冇整可以平好多。當然你買發展商一手樓又另計，不過個rate 就可能3-5%咁啦。

買樓話難唔難，話易都唔易，知道規則會比普通無知市民易上車，但一定會辛苦。

600萬單位有甚麼選擇？

手持150萬首期，目標購入600萬單位有何選擇？翻查中原地產「網上搵樓」資料，只輸入「售價500至600萬元」的搜尋條件，不限地區、不限尺數，約搜尋得1,558個符合單位資料。

其中天水圍嘉湖山莊較多可出售單位，以美湖居一個實用面積544呎的3房中層單位為例，售價575萬元。另外粉嶺中心2期一個實用面積465呎2房中層單位，售價則600萬元。

不過有網民指，東九龍都有600萬盤以下選擇，以觀塘康寜道一帶的舊樓為例，實用面積320呎有兩房，去年底的成交價約470萬。